Февзи Якъубов адына Къырым муэндислик-педагогика университетининъ ректоры Чингиз Якъубов иштиракчилерге мураджаатта булунды: «Якъында 1940 сенеси, Къырым АССР девринде, чыкъкъан Александр Пушкин, Максим Горькийнинъ терджимелери къолума тюшти. «Дубровский»ни Юсуф Болатнынъ терджимесинде корьдим. Къырымтатар тили насыл зенгин экен. Сизге риджам: ана тилимизни терен огренинъиз, онынъ ирмакъларына мураджаат этинъиз».

«Къырымтатар тили олимпиадасы мфеним ичюн эр вакъыт пек муим, чюнки бу аудиториягъа Февзи Якъубовнен бераберликте келип, иштирак эткен ильки тедбир олгъан эди. О, бабаджасына эр кимни къуджакълап, къолтутмагъа азыр экенини корьдим. Къырым ичюн энъ эсас шей – будыр. Сизлер – бизим келеджегимизсинъиз», – деп къайд этти селямлав сёзюнде университетнинъ ильмий ве инновацион фаалиети боюнджа проректоры Татьяна Гордиенко.

Аньаневий тедбирнинъ тешкилятчысы – тарих, санат, къырымтатар тили ве эдебияты факультети эркянындаки къырымтатар ве тюрк тильшынаслыгъы кафедрасыдыр.

Бу сене тешкилятчыларгъа 120 ариза ёлланылды. Февзи Якъубов адына КъМПУнынъ Муэндислик-педагогика колледжи ве Мусафирченлик индустриясы Романов колледжининъ студентлери, ондан да гъайры Къырым мектеплерининъ юкъары сыныф талебелери язма вазифелер беджерип, озь бильгилерини нумайыш эттилер.

Мартнынъ сонъуна къарарлаштырылгъан Къырымтатар тили олимпиадасынынъ экинджи къысмында алий окъув юртларынынъ студентлери ярышлашаджакълар.